Rev 5 | APZ | STEP | Ngko Anɨtu kakoe epohumayo sopo nohumanji uhwonɨmentoheso, kakoe aho anga sohohnta'ni iyoswo sawemo popoki'nnyoso mokosyohumamentisofoho. Oso iyoswo homo somo hungkuno paho hohnjo'nji ajwo'mjo'nji mtɨ'mokinyo somo impe mijaho'njoso lojwohofojahinyoso aho fehohnjo hopi'nono nom'ne mta'ni hufa'uyoho. Lojwohofojahinyoso hwapɨngo olenoho. A'amu sikinjo iyoswo homo somo mɨkwalofe'nefoho.

Revelation of John 5

Joun kako iyoswo impe mijaho'njo so'nji lojwopopojahinyo uhwonɨmentisofoho.

1 Ngko Anɨtu kakoe epohumayo sopo nohumanji uhwonɨmentoheso, kakoe aho anga sohohnta'ni iyoswo sawemo popoki'nnyoso mokosyohumamentisofoho. Oso iyoswo homo somo hungkuno paho hohnjo'nji ajwo'mjo'nji mtɨ'mokinyo somo impe mijaho'njoso lojwohofojahinyoso aho fehohnjo hopi'nono nom'ne mta'ni hufa'uyoho. Lojwohofojahinyoso hwapɨngo olenoho. A'amu sikinjo iyoswo homo somo mɨkwalofe'nefoho. 2 A'amu yokumpohn'nyo ahwomomjo sohwo mampaho mohm'no ole lɨmento, A'amu wopɨngo ne sohwo kako oso iyoswo somjo impe mijaho'njoso lokoefaofɨhwosi fisakuyo'ne hopoenohinoso tɨhwolo. 3 Ose ulahonɨngki a'amu ahwomomo humalofo sohwa hwahoponjo humalofo sohwa a'amu poyo pe'nɨmentohofo sohwa oso iyoswo homo somo fisakuyo'ne hopoenohinoso nɨhu'no awonoho. 4 Ngko oso iyoswo homo somo nofisajɨhwosi uhwonyo'ne sohumo huno uhwononji humotaho engo lɨmentohefoho. 5 Humotaho lontanɨngko hwe engo fihwo Anɨtuye epohumayo momɨngopo lohofonto kako ntɨmento, Kɨko humotaho lohotoho. Ihwoni, osopo hwe fihwo humaho. Kako a'amu Jutafe hwe engo ne hweho. Ntefit yofe engo'njo sohwoe imu hweho. Kako Setenɨmo uyakolofonto honɨngkano wonyo miyo hweho. Oso'no kako iyoswo popoki'nnyo impe mijaho'njo lojwohofojahinyo aho fehohnjo hopi'nono nom'ne mta'ni hufa'uyo'njo homo somo wofisojwao'montonoho. Ose ntɨmentisofoho.

Jisas kako nakwoe wonyo'ne poyo pe'nɨmentiso sohwo kako Yahu MuSipsip Pa'nyo imo'nɨmentiso sohumo Joun uhwonɨmentisofoho.

6 Nuhwonɨngkahonɨngko Anɨtuye epohumayo'njo sopo oso songo humalofo osofosofahu'nohino sohwanji hwe engo sohwanji nohumentanɨngkofi Jisas Anɨtuye Yahu MuSipsip Pa'nyo sohwo Anɨtuye epohumayo mofone sopo lɨkofohumamentisofoho. Hohonta oso yahu huhwo sohumo a'amu fonjahumentohofoso ime hi'njohwo uhwonɨmentohefoho. Kakoe sɨhwano'nji tɨmo'nji aho fehohnjo hopi'nono nom'ne mta'ni hufa'u'njo hweho. Kakoe tɨmoso Anɨtuye Towahuno pa'nyo'njo hwaho yawojo'meemo uyohojɨku'mo'nyofoho. Ose uhwononji ole syafɨhu'mentoho, U, sɨhwanoso kakoe yokumpohn'nyo mɨkunɨmposo yakolonoho. Kakoe tɨmoso Anɨtuye Towahuno hweho. Yo'mayo hopi'nono huno unyo hweho. Ose syafɨhu'mentohefoho. 7 Oso Yahu Mu huhwo sohwo kako nowento Anɨtu kakoe epohumayo sopo humaso sohwo kakoe aho angahohnta'ni iyoswo popoki'nnyoso ma'mentisofoho. 8 Nomahonɨngki oso songo humalofo osofosofahu'nohino sohwanji hwe engo sɨfe aho hopi'nonohino nom'ne mta'ni osofosofahu'nohino sohwanji oso Yahu Mu sohwoe sɨfɨki'nyo'mo ipitofawo'mentohofofoho. Nohumanji oso hwe engo anga'no anga'nohino sohwa hofɨko tampuyo pa'nɨngo impe pi'nɨngo'njo so'nji noswanyo na'nohino sopo tɨkayo akino wopɨngo Anɨtumne'no wo'nnyo so'nji ma'mentohofofoho. Oso tɨkayoso a'amu Anɨtumne'no jomo ulɨwo'nɨngkohofo sohwafe hungkunofoho. 9 Osopo nohumantɨfi ta songo ole ulɨmentohofi,

Kɨko iyoswo popoki'nnyo impe mijaho'njo lojwohofojahinyoso nomahoji fisaku joso hoponoho.
Hwapɨngoso a'amu kikimo fonjakohumentohofoso jɨje honɨyo usɨhuma'mentohinoso a'amu hopi'nonohinoso wonyo somta'ni mpe ema'mentohinoso hofɨko jɨje a'amu ne imo'nɨmentohofofoho.
Kɨko oso a'amu hiso temtitofo hopi'nonohino mta'angoso hungkuno kengo kengo'njo a'apaho kengo kengo somta'ni hwaho kengo kengo somta'ni ma'mentohinofoho.
10 Kɨko oso a'amu huhwo sohwamo nomanji Anɨtu'njopo mokosyohumanji hofɨko Anɨtuye syoho ulohofiyo'ne mmokumentohinofoho.
Oseso hofɨko hwahoponjo a'amu hopi'nonohino somo womokosyohumantɨfeho.
Oso ta hiso Jisasɨmo ulɨmentohofofoho.

A'amu ahwomomjo sohwa Jisas A'amufe Wonyomne'no Poyo Pe'nɨmentiso sohwoe yofe ho'noma'mentohofofoho.

11 Ngko Joun'ni apa'no uhwononji upa'nɨmentoheso a'amu ahwomomjo pi'nɨngo engo sohwafe mampahoso ho'nɨmentisofoho. Oso hopo sopo hofɨko Anɨtuye epohumayo so'nji yo'mayo songo humalofo osofosofahu'nohino sohwanji hwe engo sohwanji nohumentanɨngkofi hofɨko ku'moku'mofo ihumajɨ'mentohofofoho. 12 Hofɨko mampaho engo'nji ole lɨmentohofi,

Anɨtuye Hwomu A'amufe Wonyomne'no Poyo Pe'nɨmentiso sohwo
kako yo'mayo mokosyohumayo'ne yofe engoso, yo'mayo ho'yangoso, yo'mayo huno wopɨngoso mayo'ne kako hopoenohino hweho.
Nakwo kakoe yofe engoso noho'nomehwasi kakoe yokumpohn'nyo so'no yoloho lɨjwaofɨhwasi isamoyoka ulano.
Kakoe sɨmeho wopɨngo umo'nono.
Mango mohm'no ose lɨmentohofofoho. 13 Ose upa'nonji ole upa'nɨmentoho, Yo'mayo Anɨtu mtɨ'mokumentiso ahwomomjo sohwanji hwahoponjo hn'nnonji a'amu poyo pe'nɨmentohofo sohwanji mijo ayomjo sohwanji nakwo hopi'nono ole lɨmentɨhwoni,

Anɨtu kakoe epohumayo sopo humaso sohwo'nji kakoe Hwomu A'amufe Wonyomne'no Poyo Pe'nɨmentiso sohwo'njimo isamoyoka mɨkunɨmposo selalokuhwono.
Nakwo sikoe yofe ho'nosemalokuhwono.
Sikoe yofe engo'nji sikoe yokumpohn'nyo'nji ne'no nowentɨhwonefoho.
14 Ose ulahonɨngkofi oso songo humalofo osofosofahu'nohino sohwa ole lɨmentohofi, Ou, nehopeho. Ose lahonɨngkofi hwe engo sohwa hofɨko sikoe yofe ho'nomayo'ne hwomtame imentohofofoho.